ग्रामीण परिवेश, गुरुङ जनजीवन र सांस्कृतिक चहलपहलका लागि मध्यमहाडी क्षेत्र उपयुक्त थलो हो । यसमा पनि लम्जुङ जिल्लाको घलेगाउँ अलि चर्चित नै मान्नु पर्दछ । यसको पहिचान हिजोआज सामुदायिक पर्यटनको आदर्श नमूनाका रूपमा विश्वभर भएको छ । समुद्री सतहबाट करिब २,१०० मिटर उचाइमा अवस्थित यो गाउँबाट हिमालका विशाल श्रृंखलाहरू, मनास्लु हिमाल, लमजुङ हिमाल, अन्नपूर्ण हिमाल र माछापुच्छ्रेको अनुपम दृश्य अवलोकन गर्न सकिन्छ ।
घलेगाउँमा म पहिलो पल्ट पुग्दा त्यहाँ विदेशी पर्यटकहरुको खासै चहलपहल थिएन । तर थियो बिछट्टै सुन्दर र मनमोहक । त्यस बेला म घलेगाउँ हुँदै भुजुङ गाउँ पुगेको थिएँ । अहिले भुजुङ पनि पर्यकीय गन्तव्य भइसकेको छ । त्यति बेला घले गाउँ हेर्दै मनमा लागेको थियो, प्रचारप्रसार र पर्यटकीय पूर्वाधार बनाउन सके घलेगाउँले स्वदेशी तथा विदेशी पर्यटकलाई मनग्ये आकर्षण गर्न सक्थ्यो । नभन्दै घलेगाउँको चर्चा विस्तारै चुलिन थाल्यो र यहाँ एक पल्ट नपुगुन्जेल पर्यटनको स्वाद नै चाखिनसकेको जस्तो हुने भयो । दोस्रो पल्ट घलेगाउँ पुग्दा स्वदेशी तथा विदेशी पर्यटकहरुको चहलपहल देखियो । सामुदायिक होमस्टे, गुरुङ संस्कृतिको जीवन्त प्रदर्शन, परम्परागत नाचगान, लोकभाषा र खानपानको लागि यो प्रसिद्ध छ। यहाँका स्थानीय बासिन्दाले पर्यटकहरूलाई स्वागत गर्दै उनीहरूलाई आफ्नै घरमा बस्न दिने परम्परा बसालेका छन्, जसले आगन्तुकलाई स्थानीय जीवनशैली र संस्कृति प्रत्यक्ष अनुभव गर्न मद्दत गर्छ।
घलेगाउँको घाँसे मैदान यतिकै मनमोहक छन्, त्यसैको बीचबाट नागबेली पर्दै अगाडि बढ्ने ढुंगाको सानो बाटोले झनै राम्रो बनाएको पाइन्छ । यहाँबाट अन्यत्र पदयात्रा गर्न सकिन्छ । पर्यटकहरूले थोरै दूरीको पदयात्रा गरेर पनि लमजुङका अन्य गाउँहरु जस्तै, भुजुङ, पसगाउँ आदिको यात्रा विस्तार गर्न सक्छन्। पंंक्षी अवलोकन पनि मज्जाले गर्न सकिन्छ । हिमाल अवलोकन त भन्नै परेन । यहाँबाट प्राकृतिक सुन्दरता, ग्रामीण आतिथ्यता र सांस्कृतिक समृद्धिले भरिएको घलेगाउँले हरेक आगन्तुकको मन जित्छ।
