मुक्तिनाथ मन्दिरलाई हिन्दू धर्मावलम्बीहरु भगवान विष्णुसँग सम्वन्धित मानी दर्शन गर्न आउँछन् भने बौद्धहरु यसलाई बौद्ध धार्मिक स्थल मान्दछन् । यो क्षेत्रको धार्मिक तथा सांस्कृतिक अध्ययनमा मुक्तिनाथ एक रोचक पाटो हो ।
भगवान विष्णु ठानेर हिन्दूहरुले जुन मूर्तिलाई मुुक्तिनाथ नाम दिइएको हो त्यसैलाई बौद्धहरु अवलोकितेश्वर मानेर पूूजाआजा गर्दछन् । यस मन्दिरभित्र रेखदेख गर्ने जिम्मा बौद्ध गुम्बाका झुमाहरुमा छन् भने मन्दिर बाहिर हिन्दू ब्राम्हणहरु बस्दछन् । हिन्दू धर्मको प्रभावमा नजिकैको एउटा गुम्बामा नर्सिङ गुम्बा नामाकरण गरिएको छ । हिन्दू धर्मअनुसार भगवान विष्णुको एउटा अवतार सम्झाउने उक्त नामको गुम्बाभित्र ल्हाखाङ्मा भने गुरु पद्मसंभवको ठूलो मूर्ति राखिएको छ । गुरु पद्मसंभवको मूर्तिको सामुन्ने नै भैरवको सानो मूर्ति देखेर र नरसिंहको सादृष्य ठानेर कसैले नर्सिङ नाम दिइएको बुझिन्छ जुन गलत बुझाइ हो । यसरी नै यस धार्मिक क्षेत्रको स्थानिय नाम छुर्मी ग्यार्छ भएका बताइन्छ र हाल स्थानिय जनता यो नाम प्रयोग गर्न रुचाउँछन् ।
